李璨琛（Sam）的4歲女兒李元元（Lucy）就讀幼稚園，現時已復課，Lucy媽最近在社交網上載老公Sam教囡做功課片段，背景有Sam的聲音，教她認中文字，然後塗顏色。不過，Lucy媽笑指「李老豆」只能教囡囡做中文功課，並大爆Sam在英文及數學方面表現非常經典，她留言：「李老豆只能夠同個女做中文功課。喺英文方面，佢一定要由A至Z數落去，先能夠順利讀出26個英文字母，如果你由中間其中一個字母，問佢下一個字母係乜，佢真係未必答到你，或者會答錯；數學方面仲經典，因為有一日佢同個女做數學功課，個老豆指住個長方形，問個老母：『呢個算唔算係正方形呢？』」 Lucy媽直言李璨琛已經46歲，連長方形同正方形都不懂分辨，簡直是聞所未聞，笑言「血又嘔」。不少網友為李璨琛講好說話，「拿！46歲好細啫，唔識中間開始背英文順序係可以發生的。關於唔識分長方形正方形就唔關年齡事，大概係細個玩積木少」、「李老母下次教Lucy做功課時，可以教埋李老豆」。
