今日（19日）是沈殿霞（肥姐）的忌日，愛女鄭欣宜在社交網貼出一張與媽媽的合照，並撰寫長文悼念離開她14年的亡母 ，相中見肥姐緊抱着欣宜，欣宜則靠着媽媽撒嬌，張開口大笑。欣宜寫道：「睇吓我個樣幾頑皮。喺我返舊相嘅過程中，發現由6歲至13歲期間影過嘅所有相入面，我個樣都係古靈精怪。」
欣宜又留言：「你以為我影相時做鬼臉係因為要掩飾對自己外表嘅不滿？可能都有關嘅⋯但係我知，佢都知：安安靜靜、乖乖女女、正正經經、坐定定的對我來講先至係一種掩飾。之前都講過細個時嘅自己真係好曳。當我嘈喧巴閉、跑來跑去、坐唔定嘅時候佢只會大聲喝我一聲『鄭欣宜』再加多一個嚴厲眼神我就會靜止下來（其實通常唔使講任何野，𥇣我一眼就夠）。」
欣宜指頑皮上來，肥姐會嚴厲地掌摑她：「但當我最跩最跩例如蝦婆婆，或者突然變Moody黑起塊面冇禮貌唔睬人或者講大話時⋯佢真係會兜巴星我。然後佢就會叫我跪喺地下掹住耳仔。最搞笑係，俾佢打完，我梗係會喊啦～佢就會叫我『唔準喊！』吓！？！」
她說被每次媽媽教訓後，肥姐總會哄她，向她解釋錯在哪，「所以喺我又掙扎緊想喊但又唔準喊⋯又反思點解我會俾佢打俾佢鬧，自己做錯啲乜嘢⋯當我開始感到內疚時真係諗得通了，佢一定會叫我『過嚟，錫返』。然後我就會好似隻小胖羊走到佢身邊，貼住佢。佢就會攬住我，好聲好氣同我解釋我錯喺邊度。佢會同我解釋⋯其實打我佢仲痛過我。」
欣宜說仍會等一個媽媽般愛惜她的人，「今年35歲了。佢都走咗14年了，人愈大愈珍惜她那種不離不棄。無論我有多壞，無論我令佢多失望，到最終佢都會叫我『過嚟』然後錫返我。如果我搵到一個⋯同樣對我不離不棄⋯ 當我嘈喧巴閉、跑來跑去、坐唔定嘅時候⋯當我唔覺意發洩我嘅脾氣喺別人身上、突然變Moody黑起塊面冇禮貌唔睬人(yes, i still do this often)、當我唔知點處理問題然而瞞騙世界，進入報喜不報憂的狀態嘅時候⋯都能接受我嘅好與壞，在任何情況的最終都會叫我『過嚟，錫返』嘅人⋯就好啦。」
部分圖片來源：鄭欣宜@Instagram
