無綫劇集《青春不要臉》上周講述齊輕舟（丁子朗飾）與溫楚瑜（戴祖儀飾）分手，但其實兩人仍難捨舊情。昨晚播出的第十三集，他們相約如果齊齊升呢做到主角，便會復合；然後鏡頭一轉，他們接到電話終於擔正男女主角，舟仔即衝到小瑜家，甫打開門，未有多講一句，便立即咀嘴，不單替對方除衫，小瑜更跳到舟仔身上，由門口、走廊、轉戰到客廳梳化之上，拍攝時，丁丁因為太投入，撞到Joey爆嘴。
丁丁多謝Joey給予信任，難得遇到咁好的對手，埋位拍攝前兩人都有食香口膠，而先前已拍了好多親熱戲分，可以當作熱身，令拍攝好順利。Joey笑言所有激情場面的「動作指導」是監製及導演林肯，「佢叫我要擒上去丁丁度同埋轉身，咁我哋就自己慢慢試。個拍攝過程都算順利，拍咗兩三take左右。」
同場加映：「舟瑜」向周星馳、梅小惠演出的經典劇集《他來自江湖》致敬
