MIRROR成員呂爵安（Edan）參與拍攝的電影《闔家辣》，是他踏足影壇的第一炮，與吳君如、鄭中基、梁詠琪合作壓力不小，其中有一場喊戲，更如同是他演技的考牌之作，Edan接到劇本知道有這場戲時，已向君如透露很擔心，幸得她親授技巧。
在Edan拍攝喊戲的那天，君如沒有自己戲分，仍特地到現場與他獨處，培養情緒，教他如何開啟悲傷情緒，打開自己的淚腺。雖然Edan上了寶貴一課，卻仍擔心表現，顯得忐忑不安，鄭中基陪他圍讀試戲，梁詠琪則替他按摩肩膀放鬆心情，全場亦默不作聲，以免影響到他的情緒與表現。
當Edan順利完成該場戲分，終於放下心頭大石，不過仍對自己淚腺的存在感到疑惑，他解釋：「因為自己比較少喊同唔開心，當一啲戲需要唔開心或喊時，自己都擔心做唔做到，能唔能夠攞出自己嘅情緒，但又唔係第一次拍情緒戲，《大叔的愛》都有拍過，但對我嚟講係唔合格，當時同依家對演戲睇法都唔同，經過呢次拍攝學識好多，同其他演員未熟落，未清楚自己點樣去演時係好迷惘，經過十幾日嘅拍攝，到今日拍喊戲，已經放開咗。」
對於君如的細心教導，令Edan獲益良多，亦衷心感激她：「前一日君如已經話會嚟幫我，同埋叫我朝早空肚飲少少酒，真係放鬆咗啲，拍出嚟真係有情緒，雖然好似無咩眼淚。多謝君如幫我好多，教我點樣呼吸，點樣處理情緒，感激中基、Gigi呢十幾日同我相處，俾到我有家人一樣嘅感覺，感覺到佢哋嘅支持同鼓勵，令我好容易投入。」Edan覺得自己的表現勉強合格，「我俾自己4、5分，勉強合格啦！我唔似專業演員咁揮灑自如，但我盡咗力，君如收貨，我相信應該合格啦。」
