Advertisement

難過未能與梅姐見面 潘文皓感激姨姨供書教學

本地
2021.12.05
20.7k

screenshot-2021-12-01-at-11-27-00-am-20211201033133

電影《梅艷芳》自上映引起不少話題,除了梅艷芳胞兄梅啟明入稟告電影公司「安樂影片」侵權外,電影亦讓傳與梅艷芳失聯21年的梅愛芳長子潘文皓現身。身在加拿大的文皓接受港台《舊日的足跡》車淑梅長途電話訪問,文皓表示看了電影《梅艷芳》3次,首次觀看時全程處於想喊及正在喊的狀態。他表示戲中不少情節也令人感動,尤其看見飾演其母親梅愛芳的廖子妤與飾演其姨姨梅艷芳的王丹妮表演一幕,忍不住流下淚水。文皓表示︰「可以親眼見到她們寶貴的姊妹情,這是我小時候看不見的。媽媽離開時,我7歲;姨姨走時,我11歲,我不在她身邊。」他亦感激姨姨留給他和弟弟的教學基金,讓他們可以順利完成大學並找到好工作。

_dsf4667

訪問內容如下:


淑梅姐:你係咪一直喺溫哥華?

潘文皓:其實六年級開始就喺呢邊生活喇!當我知道有呢套電影,我一定要睇,裡面一定會講好多有關媽咪同姨姨嘅事,爹哋、細佬都有睇。印象中,媽咪(梅愛芳)係一個好稱職嘅媽咪,好畀心機教我同細佬,腦海裡邊好難想到一個畫面佢鬧過我哋。佢係一個好積極樂觀嘅人,遇到乜嘢難題都係笑住面對,正如電影情節一樣。姨姨係一個好直、好有為、好堅強嘅人,佢好鍾意講笑令身邊人開心,時時刻刻為人哋設想。細個嗰時我有少少驚佢,因為佢把聲好有力量同埋威嚴,有冇俾佢鬧過我唔記得,但係我真係有少少驚佢,我知道佢係大明星,佢係個永不放棄嘅人,電影中佢話「只要有信心、世上無難事!」呢一句正正喺佢生命話俾我哋聽。

261021623-10165990589485296-4508709373529084561-n-20211201024027

淑梅姐:你知道姨姨一直搵你哋嗎?

潘文皓:我只係呢一排先知道,當年我哋唔喺香港,唔知佢搵我哋,如果知道,爹哋一定會帶我同細佬返嚟見佢,所以當我知道佢一直有心搵我哋,亦係佢臨終前一個心願,我真係覺得好難過。我而家大個咗,可以幫佢完成心願,即係佢可以搵番我哋喇!其實呢兩三年,我有同姨姨嘅fans聯繫返先至知道有呢套電影,我先至知道有呢一件事,係佢哋話俾我知。

screenshot-2021-12-01-at-10-39-43-am-20211201024009

淑梅姐:你哋嘅近況如何?

潘文皓:我28歲,有女朋友未結婚,我而家做IT工作。細佬都好好,佢都係做IT電影後期嘅工作。爹哋好好,身體好好,好健康。我都想返香港,如果可以,我嚟緊呢半年內會返,上次2017年返過嚟,今次我會探婆婆,佢 98 歲,我好想返去見佢。

淑梅姐:身為媽咪同姨姨嘅新一代有咩感覺?

潘文皓:其實當我知道今次有咁多人仲係掛住佢哋,我好感動。做媽咪嘅仔、姨姨嘅姨甥有種壓力,我好想好似佢哋咁樣,好想學識佢哋嗰種生活態度、處事方式,因為我覺得佢哋好堅強、好樂觀積極!

screenshot-2021-12-05-at-6-38-20-pm

淑梅姐:你喺Facebook嘅中文寫得好好,有咩原因呢?

潘文皓:我一直喺溫哥華生活都有睇無綫,因為有字幕,所以我記得。我聽日會睇(《梅艷芳》)第四次,隔幾日睇一次,直到落畫,因為每一次都有唔同感受。我覺得Fish(廖子妤)好似我媽咪,特別佢短頭髮嘅時候,我好多時會睇返以前啲相。三次睇都流眼淚嘅就係見到姨姨探媽咪,媽咪病床上有張相見到我同細佬,佢望住話唔知可唔可以睇住我哋長大,就係呢一句,我聽到好難過。好遺憾佢唔可以睇到我哋長大,但我想同媽咪講,佢喺天上一直看顧住我同細佬,所以我哋唔可以做一啲令佢失望嘅事,我會好好咁生活落去。姨姨佢嗰種精神,將所有精神同時間貢獻畀歌迷、音樂、舞台,遺憾佢冇結婚,最終嫁咗比舞台同大家,佢呢個態度好值得大家敬佩!我希望佢知道而家仲有好多人繼續愛佢,掛念佢。我要同電影團隊講,我好多謝佢哋,呢段時間到處都有疫情,要為大家打氣,電影帶出咗呢種正能量同態度,值得我哋學習,好多謝佢哋!

screenshot-2021-12-05-at-1-41-06-am

+15

淑梅姐:有咩要對媽咪同姨姨承諾?

潘文皓:就係我要好好成長,好似佢哋咁對自己同對身邊嘅人。姨姨講過希望有一晚,大家食完飯出去望住星星嘅時候,會記得佢,一個曾經為我哋帶來小小歡樂嘅朋友,會記住佢個名叫做梅艷芳,我會一路一路記住佢哋,永遠永遠以佢哋為榮!

陳卓賢 姜濤 MIRROR
人氣 TRENDING
王力宏 梅艷芳 李靚蕾 姜濤 MIRROR ERROR 張家朗 香港小姐 聲夢傳奇 炎明熹