譚俊彥（Shaun）前晚（19/11）於《萬千星輝賀台慶》帶領一眾新生代演員表演手舞項目，他於綵排時已透露舞蹈是最大的障礙，需要積極練舞。今天（21/11），Shaun在社交網分享表演後的感受，表示一直都視跳舞為一大考驗，當接到要跳舞的通知時，自問能否勝任，「仲記得第一次排舞嘅時候，只係記動作都覺得好吃力‥‥‥我知道表演當晚我有啲生硬，可能因為我真係好緊張，開show前五分鐘，我突然之間好似忘記咗幾個禮拜努力排練嘅step，我亦都唔敢同人講，只好自己戴上耳機縮在一角盲目排練，嗰陣時好無助我打咗俾我太太，佢當然一直安慰我仲叫我個仔同我個女同我講咗句daddy加油，我叫佢哋記得喺電視機上面睇daddy，嗰陣時我我同自己講一定要加油努力完成今次嘅表演。」
Shaun順利完成挑戰，覺得很感恩，「40歲好感恩我有一次機會，去面對以前因為一路做得唔好而選擇去逃避嘅跳舞。我知道呢個技能對我嚟講仲未解到鎖，但我會努力去增值自己，勇敢去面對以前唔敢面對嘅事！」
