「聲夢學員」炎明熹（Gigi）、姚焯菲（Chantel）、冼靖峰（Archie）、何晉樂（Rock）、鍾柔美等以學生裝上陣出席無綫青春歌舞劇《青春本我》拜神，而高層樂易玲、曾志偉及何麗全等亦有到場支持，現場宣布Gigi首隻新歌《真話的清高》成為熱唱榜冠軍。Gigi透露大家在劇中飾演有心理問題的學生，對於初次拍劇，她表示非常緊張，「暫時拍咗少少，我只係開咗一日工。」她拍劇中有喊戲，不擔心喊出，「少少緊張，應該可以，因為導演會幫我。」
提到有否感情線，Gigi笑稱可能她跟Chantel有，她又大賣關子表示有可能親熱戲；不過Chantel則指因為她們年紀尚輕，故不會有這些情節，「編劇知道我哋第一次拍劇，冇畀好難嘅角色，都係做番自己性格，唔需要扮。」Chantel被問到她近日在社交網表示要重做功課，她解釋：「唔係重做，嗰個係好耐之前，新功課係視藝老師畀，我好驚『肥佬』，因為我畫畫唔叻。」她直言為了兼顧工作和學業，一有時間就做好功課。
