徐天佑與黃又南2002年以組合Shine出道，樂隊即橫掃各大音樂頒獎禮的組合獎和新人獎，成為新一代年輕偶像，兩人去年正式拆夥。今日（11日）天佑在社交網發表新動向，透露自己要離開合作20年的經理人公司。
天佑指20年裏面在經理人公司做過很多東西，「因為呢行真係唔係咁穩定，做吓呢樣嗰樣製作呀、幕後呀、專欄呀、餐廳都搞過，但係演藝方面，一直都冇轉過其他公司。今次呢一步對我嚟講絕對唔容易，畢竟，我中學三年級十四五歲開始拍廣告簽經理人，中五畢業就入行拍戲，一做就做到依家，睇住呢一行嘅轉變，亦睇住時代嘅轉變，試過成功失敗迷惘一沉百踩，記得有段人生跌到谷底再谷底嘅時候，身邊有人仲話想提點我話我嘅事業有危機，我真係多＿謝。然後，就算個天跌落嚟我都要食飯㗎，所以周圍搵吓機會，終於真係有導演老闆俾機會，結果仲忙過之前，所以記住就算幾唔掂都唔好俾人打沉，因為有『危』就有『機』，然後，咁就廿年。」
天佑解釋今次此決定的原因，「真係都冇咩好特別嘅原因，老土啲講係想繼續Push自己，要發掘新嘅嘢就要冒險，所以決定改變。諗返起，經理人睇住我由小朋友成為大朋友，𡃁仔成為人夫，大家都經歷咗好多，真心非常多謝佢嘅照顧，亦非常感恩呢段緣份。冇咩嘢嘅又唔係轉行，換個環境，換個模式，繼續出發！期待快啲有新戲、新劇、新歌、新廣告俾大家，大家繼續多多支持，就係咁講住咁多先，大家都要… Work hard Play hard！身體健康！」
