天下無不散之筵席，現時拍至800多集的《#後生仔》終於要「畢業」，據知全因一班熱血幕後對於製作新類型節目諗頭甚多，各前線主持亦愈來愈多不同類型發展，單以一班「後生仔」為例，孔德賢、游嘉欣等均忙於拍劇；黃婧靈（波波）、呂靜文等則忙於綜藝，眾人要夾時間聚頭拍攝愈見困難。
昨晚26名打扮高貴、隆重的「後生仔」聚首一堂，拍攝以畢業禮為主題的最終回，節目將於九月底無綫J2播出。眾人錄影期間大談過往四年的難忘經歷，其中元祖主持陸浩明（6號）及馮盈盈被爆「過從甚密」，二人原來經常約埋錄影日齊齊返工，戴祖儀提及此事時爆料謂：「只要陸浩明自己一個返工哩，佢嗰日就唔會遲到！」另一主持鄭衍峰則指二人於拍攝海外版時嚴重醉酒，更因而引爆大量爆笑事件，連幕後工作人員也因而遭殃。至於林穎彤（Bella）則被幕後踢爆經常流露出渴望收工的眼神，令Bella哭笑不得。
到了熄燈意味節目「後會有期」一刻，眾主持及後生仔均大感依依不捨，但亦不諱言對新一輪工作十分期待。6號坦承早視一班「後生仔」如弟妹：「四年時間眨吓眼就過，大家感情好好又好玩，我哋私底下乜都講。開始時睇住佢哋一邊讀大學、一邊拍節目，我就同佢哋講係好辛苦但值得，呢個節目會係佢哋人生一個難忘嘅時光。」盈盈亦指早已當了台前幕後是老朋友：「每個星期五都風雨不改咁開廠錄影。我哋一班後生仔同台前幕後嘅關係已經超越工作，變成每星期一次嘅老朋友敘舊。另外我亦都好唔捨得節目嘅支持者同觀眾朋友，多謝大家一直以嚟嘅愛戴同支持。」談到新工作，6號表示稍後要忙新慈善騷及台慶月節目拍攝，盈盈則透露剛完成短劇客串，並謂正籌備神秘計劃中：「大家要多多期待。」
