對於演員，「喊戲」好多時都係考牌作，而喺《七公主》飾演顧雙兒嘅江嘉敏日前都要接受「考牌試」了。
12歲已考獲演奏級的江嘉敏，演戲資歷只有4年，喺《七公主》劇中角色相當複雜，看似活潑聰穎，其實心事重重；看似冷酷現實，其實熱心助人；更同時有心地善良及暗黑古惑的矛盾面，恍如黑化了的天使。而網民亦有感江嘉敏駕馭角色不慍不火：「江嘉敏其實演技唔差，又識彈琴。」、「江嘉敏個角色最討好，都做得幾好，終於唔使扮細路女。」
昨晚播出的第14集，因虛假文書及欺詐罪等被捕的雙兒，於案件聆訊前探望患腦退化症生母龔儷（馬海倫飾），欲向其坦白過錯；期間生母雖然叫得出雙兒名字，但卻記錯雙兒是鄰居女兒，雙兒情緒秒速遊走天堂與地獄之間。雖然龔儷不記得雙兒是親女，但卻對其專長及童年頑皮事一清二楚，對此雙兒再度跌入既喜且悲的感動漩渦，並含著默然落下的淚水說：「冇人蝦我，但我做咗件好錯嘅事！」龔儷聞言即大表緊張，更拿出雙兒最愛的軟糖予以安慰，場面催淚。
由於江嘉敏將雙兒的極度複雜情緒拿捏得恰到好處，獲網民激讚：「喊得好自然，想忍但忍唔住嗰啲樣」、「佢出咗道唔係好耐就咁識做戲」、「第一次覺得江嘉敏喊戲OK，頭先呢幕有感染到我」、「佢平時做開開心果，好似冇咩見過佢喊」、「呢啲親情戲我都睇到眼濕濕」、「真係Feel到佢嗰種Sad」、「真係今集焦點」、「佢喊得好真，好容易代入咗」、「其實江嘉敏做戲一向不錯」。未知是否因江嘉敏演技好加持，網民對於雙兒的聆訊戲份亦看得相當肉緊，一方面覺得她應該得到應有懲罰，但另一方面又忍不住同情她，因為角色夠善良。
