周潤發今日（07/08）出席香港浸會大學舉行的榮譽博士學位頒授典禮，發哥獲頒榮譽人文博士學位，表揚其傑出專業成就及對社會的卓越貢獻。
發哥致辭時重提自己10歲的時候，跟媽媽飄洋過海來到香港，當時居住環境惡劣，讓他感覺很大的壓迫感，於是時常跑到戲院打發時間，「其實套戲做乜我唔知，我只係鍾意歎冷氣。」
直到70年代投身社會，他報讀無綫藝員訓練班，一年後畢業地展開長達9年的無間斷拍劇生涯，他說：「每日不停講對白，06開始，外景講，返到廠、連瞓覺都係講對白，9年來都係咁，你問我拍咗乜，真係唔知。到咗80年代，我見得最多唔係我媽，係鄭裕玲，日日只係唔見幾個鐘，佢係响電視台陪我最多嘅藝人。」
80年代是發哥的另一個轉捩點，當時新浪潮回流香港，他84年投身電影工業，與一些新浪潮導演合作，發現與無綫的導演完全不同，「呢班新浪潮導演帶俾我嘅，係以前電視台導演俾唔到我，對白亦唔使講咁多。好好彩！86年拍咗吳宇森導演的「英雄本色」，打後10年响槍林彈雨下過，我可以講，我開槍用嘅子彈，多過當年一哥。」
發哥94年努力學習英文，兩年後拍了第一部西片，但對白並不多，繼續「揸槍」搵食，笑言：「我仲記得有句對白就好似我哋喺『大酒店』聽到嘅，對家屬講嗰句節哀順變差不多，死得啦，第一部戲就咁，大家都見到，我响荷李活嘅發展都係節哀順變！」
發哥於99年與李安合作《臥虎藏龍》，便發展至今，他發現有趣的是從影多年由廣東話轉戰英文，再轉講普通話，都是因應環境轉變而強逼適應，他說：「嗰時要搵食，响片埸百幾甚至幾百人等住你，冇得做唔到。當然，香港人俾咗我好多鼓勵、包容，愛錫！仲有好多謝香港呢個地方，賦予我智慧同愛我，要多謝香港這個地方、香港人，多謝各位。」
浸大校長衛炳江讚揚發哥體現了香港人的拼搏精神，塑造了香港電影的輝煌年代在海內、外都是極受歡迎的人物，表示：「不論高山低谷，周博士一直默默耕耘，努力不懈，即使名成利就，仍不斷學習，不斷挑戰自己，更重要是他時常保持謙卑和感恩的心，他的毅力和待人接物的態度，堪稱年輕人的典範。」
