東京奧運會將於明天開幕舉行，TVB最近都大搞《明星運動會》炒熱東運氣氛。但你又知唔知原來呢啲藝人都曾經係運動員？
陳卓賢（Ian）－香港男子排球代表
陳卓賢
Ian嘅音樂才華吸引唔少粉絲，而佢除咗能歌善舞之外，仲係一名運動健將。Ian中學時期被選拔加入排球隊，從此展開排球員生涯，Ian出道前曾經係香港男子排球嘅代表，出道之後第一套劇集就係以排球為主題嘅《男排女將》，可以話同排球好有緣。
余德丞（Dickson）－港隊泳將
余德丞
大家都知方力申係前港隊泳將，但原來余德丞都曾經係港隊泳將。Dickson求學時期開始已經係游泳運動員，中學已入選香港游泳代表隊。余德丞主持過多個體育節目、兒童節目同音樂節目，如《里約奧運會》外景主持、《Think Big 天地》、《我的神奇音樂之旅》等等，之後仲有機會參演電劇，係近年TVB「新一代男神」。
陳建安（on仔）－前港隊足球員
陳健安
今年重新集開騷嘅C AllStar原來都有一位運動健將，佢就係陳健安（on仔）。On仔係前港隊足球員，更加係花式足球嘅創辦人。On仔14到18歲係香港足球青年軍， 2007到2009年球季仲係香港足球聯賽嘅甲組足球員。
陳奐仁（Hanjin）－國家隊游泳隊
陳奐仁
陳奐仁（Hanjin）減肥成功，由肥仔變肌肉男，令大家非常驚訝，仲一度成為城中熱話。Hanjin係出名嘅唱作人，亦擔任過TVB超級巨星嘅評判導師，但你又知唔知原來佢曾經都係運動員呢？Hanjin係國家隊游泳隊嘅隊員，大學嘅時候更加入過欖球隊，多才多藝。
陳展鵬－香港乒乓球隊員
陳展鵬
最近喺《明星運動會》大顯身手嘅陳展鵬，又有幾多人知原來佢曾經係香港乒乓球隊員呢？陳展鵬自細鍾意打乒乓波，13歲被發掘，加入銀禧體育學院受訓，之後加入香港青年隊，入埋港隊打波。可惜因為教練離開球隊，所以就放棄咗打乒乓波。之後加入TVB，2016年憑《城寨英雄》奪得視帝，今年重返樂壇出新歌《零歲》，唱俾「前世情人」聽。
圖片來源：陳卓賢、陳建安、陳奐仁、陳展鵬、余德丞＠Instagram、Facebook、my TV SUPER(www.mytvsuper.com)
