《聲夢傳奇》昨晚播出準決賽，冼靖峰（Archie）與何晉樂（Rock）打破成見，一起合唱《怎麼捨得你》，最終分數接近，Archie以一分之微擊敗Rock，公布成績時兩人更興奮得相擁。兩人曾在綵排時透露，輸了的一方能跟偶像合唱，所以贏輸已顯得不再重要。豈料，《聲夢傳奇》的Youtube頻道於賽後上載兩段絕密片段，節目中從未曝光，就是Archie與Rock圓夢，有幸與偶像張敬軒分別合唱《青春常駐》。
Archie昨晚於IG發文分享感受：「我哋都承認大家對大家真係有成見，但係一次又一次嘅夾歌session再加少少嘅傾訴，發現其實大家去到尾都係識得欣賞大家，最後個『興奮過屯馬通車』樣應該代表了一切。打破成見嗰下唔係最正，最正係佢話興奮過屯馬通車，1312（分數）嗰下我真係開心到爆炸就真嘅，好彩都有得同偶像合唱，起碼rehearsal嗰陣都賺咗，好好準備決賽了。」另外，他又感謝導師泳兒：「一直幫助我，我知我自己嗰套成日都改唔倒，但係我會盡力搞搞個唱腔同埋要處理得細膩啲！BTW我返去一路plank，一路唱個高音真係有用，但係未用到係唔plank嘅時候，等我再研究下！」泳兒留言：「知道你有好用心去進步，突破自己，下一round繼續加油，個plank做多啲練成腹肌都有帮助㗎，期待你六嚿腹肌。」軒仔亦留言：「仔，記得放鬆個膊頭！你嘅用功同埋謙卑，會令你行得好遠好遠。」Archie回覆：「知道保姆！我一定會注意好！感激感激！」
Rock亦在IG分享賽後感受，表示：「說不上天衣無縫，但也配得上雙劍合璧，雙管齊下‥‥‥我哋知道要對決時，我哋只有一個目標，就係一齊出線。我地各自都好努力，並唔係要贏對方，而係戰勝自己，將呢首歌成為一個完整嘅作品。（講真，我哋把聲係夾嘅，不過真係唔好搞hehe組合，我驚我爆血管）我哋今次係更短嘅時間內準備兩首歌，講真我哋真係超額完成咗啦！要唱多首歌我真係壓力嚟㗎！（雖然我都好想同軒仔合唱）不過入到決賽，真係好！開！心！」
圖片來源：何晉樂、冼靖峰@Instagram、myTV SUPER(www.mytvsuper.com)
