黎明的「Talk & Sing紅館演唱會」,昨晚(15/07)來到第6場,Leon由「金句王.變身「手勢王」,自創全新示愛手勢,用手指做圓圈動作,再放在眼睛前,說道:「人群之中我只看到你!」全場尖叫連連,Sweet到爆!
Leon請來鄭伊健擔任嘉賓,兩人曾於2003年合作電影《雙雄》,伊健坦言有兩件事很深刻,他對着Leon說:「你記唔記得有一場戲喺條好靚嘅隧道拍?嗰度係化糞池,當時沙士好犀利,喺咁嘅環境拍攝我好驚,但你好淡定,嚟到仲笑住同我打招呼。當時我心諗:『我哋一齊拍戲,佢都唔驚,我唔使驚。』」Leon笑說:「其實我唔知嗰度係化糞池,拍晒返屋企先知道。」
另外,伊健又讚Leon有紳士風度,當年兩人都很喜歡車,有一天他駕車到片場,Leon對伊健的愛車很感興趣,於伊健二話不說將車匙交給他,並豪氣表示:「隨便玩!」但伊健看到Leon打開車門沒有立刻上車,而是先坐下,雙腳在車門外拍拍鞋底才踏入車廂,「因為佢唔想整污糟架車,好有紳士風度,好有禮貌,大家學呀,好加分㗎!」Leon解釋向來有這個習慣。
當年他們合作《雙雄》時,正值沙士肆虐時期,伊健回憶道:「當年我哋拍完套戲,疫情就消失,希望今次我哋第一次紅館合唱之後,疫情盡快消失。」說畢,兩人背對背合唱《友情歲月》。