ViuTV節目《調教你MIRROR》日前邀請鄧麗欣（Stephy）驚喜現身，呢次係Stephy拍完《男排女將》後第一次同MIRROR重遇。
鄧麗欣mirror
身為已解散9人女團Cookies成員，鄧麗欣（Stephy）喺節目入面同MIRROR 12子分享經驗，Stephy坦言組合成員要互相了解、磨合，需要花好多心力，所以成員之間有問題係好正常，仲話拍攝《男排女將》嘅時候自己都懷疑過Ian同其他成員不和，因為Ian有陣時會「自摺」唔同其他成員交流。
Stephy更表示曾經對Cookies成名曲《心急人上》感煩厭，因為有太多人經常提到，而且又唔係Stephy鐘意嘅曲風，令佢當時好唔鍾意去迎合團隊，開始對呢首歌感到煩厭。最後毫無預警下Cookies由9人團體縮減至4人團體，再到解散，佢發現自己未享受過青春，而家反而愈聽愈鐘意《心急人上》，唔係因為變得鍾意《心急人上》曲風，而係因為Stephy鐘意以前Cookies一齊活動嘅回憶，「呢段回憶係唔可以重來、而家搵唔翻。」
Stephy又透露當年有段時間覺得女團工作好辛苦，因為酬勞要平均分成9份，所以賺唔到錢，又要迎合大家，做唔到自己真正鍾意嘅事。但而家諗起會覺得係一種幸福，自己一個新人打拚會辛苦好多，而且冇一齊努力嗰種令人值得回味嘅回憶，故鼓勵MIRROR成員享受團體時光。
最後MIRROR知道《心急人上》對Stephy嘅意義之後，即時練舞排舞送畀Stephy，令Stephy大嗌感動。
圖片來源：ViuTV 、鄧麗欣＠Instagram
