草蜢成員蔡一傑去年初開設《傑少煮意》YouTube Channel分享入廚心得，轉眼間已累積近12萬訂閱，而最新一集更邀請修哥胡楓嘉賓接受尖銳問題考驗，當中最出位的問題竟然是問何時失身？
蔡一傑與修哥私下亦師亦友，他還安排蔡一智、蘇志威一起同修哥食餐好，他說：「其實請修哥做嘉賓有兩個原因，第一個原因係年頭修哥生日，因為疫情，無機會同佢慶祝，第二個原因係知道修哥再喺紅館開演唱會，所以決定call埋兩個兄弟，同修哥慶祝吓，我今日準備嘅餸比較簡單，唔想修哥開騷前食得太heavy，所以我會煮一個炒粉絲蝦同埋番茄薯仔湯，另外我親自包咗啲咸肉糭，送俾修哥食。」
拍攝《傑少煮意》期間，蔡一智、蘇志威準備了一堆尖銳問題考驗修哥，其中一題要他講出「何時失身」，時間地點人物都要交代清楚，原本揸鑊鏟專心下廚的傑仔，也馬上罷工走到修哥身邊八卦。正所謂薑愈老愈辣，修哥雖然沒有自爆初夜經過，但就相當俾面，除大讚傑仔在他心目中是最佳廚藝高手，還在節目中開金口，獻唱《一雙舊皮鞋》，叫在場所有人聽出耳油。