向海嵐（Anne）同王賢誌（Vinci）不時被讚凍齡有術，二人日前一同出席活動，大談凍齡秘密。
向海嵐同王賢誌異口同聲表示心態決定狀態，保持心境樂觀開朗是秘訣之一。Anne坦言自己在保養方面下了不少功夫，更分享keep fit心得。「其實去年全年疫情影響下，自己都比之前注重健康，即使每天點懶都堅持在家做30分鐘簡單運動，晚上六點後則戒食澱粉質，亦有食保健產品，畢竟有些supplement是平日飲食中吸收唔到。」
另外，向海嵐透露更會為今屆港姐競選擔綱導師一角。「其實詳細要做些甚麼還未知道，但自己港姐出身，眼見佢哋今年咁重視香港小姐競選，當然好開心，佢哋有呢個構思好好，自己希望以過來人身份俾貼士師妹，我應該唔算係好嚴苛嘅導師。」
至於另一代言人王賢誌，好直接說：「我過咗五十歲就唔係秘密，keep住運動好重要，自己都好好彩，遺傳下手手腳腳都瘦，所以望上去就fit啲。」但好多人結婚後都會「幸福肥」，Vinci跟另一半Kevin 卻越愛越fit。「我哋結婚就快五年，但大家一齊生活就已經好耐，拍拖時候都試過有幸福肥問題，加上我飲食方面唔算好小心，好喜歡食煎炸及肥膩嘢，反而佢就好節制，雞皮一定唔食，做運動恆心又堅定過我，我有時太熱就推遲明天才做，他在身邊就不時鞭策我，見我食雞皮又『喝』一下阻止我，互相影響下，大家都有好多好嘅影響。」