王梓軒（Jonathan）近視達七百多度，纏繞他多年，不戴眼鏡就朦查查，經過多番考量，他日前扚起心肝做矯視手術，並拍片紀錄。
未入手術室時，Jonathan表示很緊張，「我好多年係大近視，七百幾度，今日我準備去做矯視，噚日就去咗檢查眼角膜、瞳孔得唔得？我今次做smile個手術，比起Lasik新啲，我戴眼鏡二十幾年，戴con都戴咗好耐，之前拍劇、做運動都唔方便，拍劇拍得耐雙眼都會乾，又成日驚拍劇要打鬥、跳海或者大風甩咗隻con，所以把心一橫做手術。」
梓軒見完視光師及醫生驗眼後，穿上防護衣並戴上手術帽，戰戰兢兢的進入手術室，消毒完眼皮並滴上麻醉藥水後，梓軒不發一言，準備躺在手術床上，醫生先將梓軒一隻眼睛蓋上紗布，另一隻則用支撐架固定眼睛，smile矯視手術大約15分鐘完成，接着加多一個「角膜交聯術」，可以鞏固眼角膜，兩個手術全程不多於半小時。
手術成功後，Jonathan表示：「我依家感覺好似有好淺嘅近視，並灌了牛奶入眼裡，奶昔布咁，有少許矇矓，但比我冇戴眼鏡好好多了」他指手術沒感到痛楚，「就似發了一場夢，因為有個激光頭逐漸『隊』埋你隻眼度，最接近時會睇到好多顏色，有白色、綠色，然後割開眼角膜後，突然間一片白色，我初時都驚，咦！乜都睇唔見，之後睇到一啲黃色，係醫生落嘅藥水！之後因為要做角膜交聯術，傷口癒合時，我睇到橙色燈，又橙又綠，好似睇80年代迷幻嘅MV，好多光咁，不過醫生真係處理得好好，其中有一part，我舒服到瞓着咗，依家我可以重見光明。」
