苑瓊丹（苑仔）近日不停為新開設的即食餸包做宣傳，苑仔更親力親為監督每個鏡頭，務求令影片拍得最好。她更邀得鄭則仕（Kent哥）亮相宣傳片，苑仔知道老友口味，專程帶對方到燒味工場品嚐「即燒三層燒腩仔」，Kent哥表示：「佢叫到我就冇法抗拒喇，次次都係出『雞脾打人牙較軟』呢招！其實我就鍾意食嘢，煮飯就因為疫情逼出嚟，廚藝食得入口啦，算唔上係精品，都係睇食譜學吓學吓咁煮。其實我就好想煮一次比苑仔食，但係次次同佢食飯，佢都係出街食，又比佢爭贏埋單。」
Kent哥指要跟苑仔學做生意，大讚老友甚有從商天份，祝對方成為飲食大亨，「我就做過好多生意，但全部都失敗收場，所以唔敢同苑仔夾啦，要同佢學嘢！呢排疫情少見面，二人限聚令更加唔約啦，因為佢帶唔到老公、我帶唔到老婆，你知佢幾風流㗎啦，實比人講閒話，所以今日拍片先敢比佢餵我食舊叉燒咋。」
苑仔話圈中「肥仔」都是自己老友，找他們拍片撐場最合適，「因為我所有朋友都有咁上下體重，好似Kent哥、肥仔聰咁，佢地拍片就突出到當中嘅好味，啱晒今次主題啦！Kent哥份人最渣就係輸喺個『情』字，我求吓佢幫幫手，佢就會應承撐我。」她更大讚好友廚技高超，對食有深入研究，「佢地兩公婆都好客氣，有時亞嫂又買蛋糕、又買生果，Kent哥就負責落廚煮飯，佢最拿手整燒雞同蓮藕炆腩仔，講究到邊個街市買邊樣材料，所以佢唔做戲走去開餐廳，一定晚晚爆晒場。」
