雨僑今年8月與老公羅力威迎來愛情結晶品羅約彌「Harper」，一對新手父母不時在社交網分享B女的生活點滴。趁囡囡出世100日，雨僑與老公以及其父母，齊齊到酒店為Harper辦了一個簡單的百日宴慶祝。穿上粉紅衣服的Harper眼仔碌碌，又不時玩玩小手，相當可愛！
雨僑昨日在社交網貼出與家人的合照，並撰長文分享初為人母的感受，「Happy 100 Days！最後都係擺唔成先生期待嘅《龍珠》主題百日宴喇，不過我哋都度過咗愉快嘅一日，由懷孕後期到初生三個月，半年我無拍過片無寫過任何深入分享，全天候照顧Haper，所以依家點都要長氣一下。」她指這BB出世一百日內經常哭，更自己「喊得仲多」，「由每分每秒都唔知佢喊乜，總之就日喊夜喊，一日嘔濕十幾套衫，鍾意就三日唔屙屎，到知道佢有肚風呀搓肚仔呀，人生目標短到淨係想你捱過一餐奶，唔好三個鐘頭全喊，見到你成條鱔咁fing嚟fing去，個肚一定好痛真係好陰功。」
雨僑表示無時無刻都在照顧愛女，又時常擔心囡囡睡不好，「到依家基本上係我幻想中嘅BB食玩瞓，真係萬水千山，為咗唔好嘈醒對方，總之諗得出嘅都試過晒，包括一個瞓一個匿喺廚房抱住，因為廚房最遠，最長試過十四五個鐘無離開過我心口，條頸同對手睇完醫師馬上又痛返，媽媽手已經唔理，係媽媽背媽媽膊媽媽全身，無數個夜晚抱住佢望住個天由黑變光，嗰種感覺真係難以形容。」湊B雖然十分辛苦，雨僑卻很享受過程，「但係相信好多媽媽同我一樣，會覺得自己湊係值得，同埋就算有人幫嘅媽咪都唔會舒服太多，可以抱就抱因為佢大個就唔使你抱，望住佢初生細細粒到肥肥白白識笑，真係覺得好幸福。」
雨僑最後還為其他「百日媽媽」打氣， 「收到好多百日媽媽問我點算好，以前你問我暗瘡點算毛孔點算，我有10個方法俾到你，新手媽媽嘅辛酸，我真係只可以同你攬住一齊喊，然後咬緊牙關繼續戰鬥。無論如何，知道好多朋友都係睇咗我嘅分享十多年，我都會繼續同大家分享，尤其今年媽媽們，其實所有人都係好難捱嘅一年，我哋一齊加油。#其實我真係有咁長氣 #唔知有冇人會睇 #唔介意嘅話我每日都有好多嘢想講 #只係過去嗰半年無時間打」
圖片來源：雨僑@Instagram