張頴康婚後與太太麥雅緻育有一囡一囝，出名是廿四孝爸爸的他，近月因為女兒張雅喬（小豆）的一句說話，戒掉了吸煙的習慣。日前是他戒掉電子煙的第100天，他在社交網發文表示戒電子煙時身體有很多不良反應，例如發冷和無法集中精神，這是他以前戒傳統煙時沒遇過的情況，所以他懷疑電子煙含有很多不明的化學物質，勸大家要正視這個問題。
張頴康說立下決心戒電子煙的原因是因為女兒小豆的一句說話，因為小豆在他的背包找到一盒電子煙煙彈，其後對他說：「我唔鍾意你吸煙呀！」這句說話當晚便深深記在他的腦海裏，到了第二天，他因為不想女兒不開心，於是便決定把電子煙的用具交給太太，立下決心要戒電子煙。
張太為了令張頴康可以堅持下去，便叫小豆每天在月曆上貼上貼紙，使他每天也想起要向吸煙say no，來到今天已是第100天。最後，《明周》提提各位讀者，吸煙足以致命，要relax減壓有好多方法，不如試試做運動吖。
張頴康全文如下：
「戒咗煙100日喇！2020年8月4日，小豆突然喺我背囊度攞咗包電子煙嘅煙彈出嚟，問我係乜嘢嚟？我答：『爸爸攞嚟Relax嘅！』點知換嚟小豆一句：『我唔鍾意你吸煙呀！』我從來都冇喺佢面前食過，原來佢一早已經知道係乜嘢嚟！『我唔鍾意你吸煙呀！』呢句說話，就好似一支針插咗入我心咁樣！到第二日，2020年8月5日，下午收工揸車返屋企嘅路程上，不停諗起小豆講呢句說話，當時好唔開心，唔知點做好！跟住我就同自己講，不如試吓由大老山隧道到吐露港唔食吖！OK喎！跟住再試吓返屋企剩餘嘅路程都唔食吖！又OK喎！」
「我一返到入屋企門口，即刻將所有電子煙嘅用具，交晒俾老婆，同佢哋講：『我唔食喇！』，今日已經係第100日喇！
我一直好想同大家分享呢一件事，因為即時戒煙嘅頭20日裏面，我經常標冷汗，身體Keep住低溫，開工嘅時候集中唔到精神（仲要係幾句對白都記唔到）
「以前戒傳統煙仔嘅時候，都冇呢個情況！咁點解我戒電子煙嘅時候會咁辛苦？即係話，一直以來我都唔知吸左啲乜嘢化學嘢入去身體裏面，到冇咗嘅時候，身體會出現咁嘅反應！所以我覺得好恐怖！我呢個Post，並唔係呼籲人要戒煙，而係想俾大家知道，食咗電子煙之後對我身體有幾大傷害，同埋電子煙裏面有乜嘢化學成份會令到你冇咗佢唔得！食緊電子煙嘅朋友，真係要正視下呢個問題！
「喺呢100日裏面，我老婆諗咗一個方法，就係叫小豆，每日貼一張貼紙俾我！老實講，呢個方法好成功，因為我唔想喺個月曆見到大交叉！就算Bell Bell離開嗰一日，我心情低落到爭啲想食返，不過好彩我諗起呢本簿，所以最後都冇食到！
可能大家會諗，100日啫，隨時都可以食返啦！錯喇，電子煙唔係通街都買度，係有難度㗎！況且我經歷咗嗰20日Keep住標冷汗嘅狀態，我諗吓都唔會再想食返！多謝小豆令我做返個盡責嘅爸爸！期待儲夠365張貼紙再同大家講！P.S.我好肯定小豆唔知我吸煙，一定係我老婆講俾佢聽！不過點都好啦，我老婆真係用心良苦！老婆，錫哂你！」
圖片來源：張頴康＠Instagram