江伊晴（Elanne）兩年前與友人合資開設貓酒店，今年更細舖搬大舖。早前Elanne接受香港開電視主播馬梓軒訪問，她分享堅持在疫市擴充的原因，「呢件事對我嚟講好瘋狂，好多人覺得我癲咗！疫情下最差試過淨係得一間房租出，但點解喺呢個市道下，我仍然想搬間大啲嘅舖，係因為呢兩年，呢盤生意真係令我好開心，好有成功感。」她直言這工作可以幫到好多主人，至今已有200多個熟客。
雖然疫情下經營困難，Elanne卻未想過放棄，全因背後得到老公蕭唯展（Oscar）不斷鼓勵，「佢俾我好大嘅支持，喺生意差嘅時候，我有問佢應該點做！同埋佢都有同我講，話做生意一定有高有低，如果遇到少少難關就話要放棄，咁呢個並唔係我自己！」
而談到Oscar的飲食生意，疫情下同樣受到衝擊，Elanne坦言有關心對方，「我梗係有關心佢嘅工作，因為疫情下啲人少咗出街食飯，生意一定有影響！不過我唔會好擔心，因為佢始終做咗生意咁多年，我會喺旁邊不斷支持佢！同埋疫情期間，佢有問我做呢個抗疫套餐好唔好，然後我就會作為一個普通市民，望吓個餐單吸唔吸引，抵唔抵，喺呢啲情況下俾意見佢！」
