香港人喜歡去旅行，但近期受疫情影響，大家只能Stay Home，冇得想飛就飛。對於洪卓立來說，旅行也是他生活中必要的事，而家冇得出發，唯有唱住新歌《我們都想旅行》頂頂旅行癮先。
《我們都想旅行》的創作靈感是來自Ken去旅行時的一個習慣，他說：「就算啲鋪頭閂晒，我都好鍾意夜晚周街走，個感覺係好舒服，好似你愈行得耐就愈放低得多負能量、唔開心嘅嘢，所以每一次去旅行我都會咁做。而家呢隻歌嘅歌詞就正正講緊行緊路嘅呢一段過程。」他坦言這首歌是他近五至七年來最難唱的歌，更以「發洩」二字去形容這首歌，「去旅行我會開住google map漫無目的周圍行，有時為咗影幾張相，我會特登搭一、兩個鐘頭去一個地方，影完就返酒店，過程好似好無聊，但係確實係有治療嘅功效，有一個放低一啲嘢嘅功能喺度。」
歌曲MV亦有別於一般「靚靚仔仔」的街景拍攝，整個MV都是由一名插畫師畫出來，Ken表示十分期待，「有好多畫面而家唔可能搭飛機去拍，於是就搵咗呢位叫阿萊嘅插畫師去實現一啲想拍嘅畫面，可能係冰島、日本等等嘅地方，可以畫到我瘦啲、又可以畫到我靚仔啲，哈哈。」因為疫情關係，令很多喜歡去旅行的人都無法隨心所欲地起飛，Ken亦然，他說：「喺疫情好轉之前，我哋要好好照顧自己嘅心靈健康，提醒自己要快樂，期待下一次旅程。」他續說：「希望每一年都有時間去唔同嘅地方，可能好近地方嘅旅行都已經達到我呢首歌嘅效果，影吓相、食啲好食嘅嘢，其實最重要係叉足電返嚟繼續工作。」
