方健儀（Akina）早前為香港開電視《娛樂頭條E-news Headline》拍攝星級教室環節，向主播馬梓軒分享提升口才心得。Akina稱演說時可用一段精彩的開場白吸引觀眾，「我好鍾意用反問句！例如主題係致富，開頭可以話『在座有冇邊位好想發達？』然後加上表情同語氣，就可以勾住觀眾思維，同時亦可以敲醒大家唔好瞓覺啦！」
現身為職業司儀的Akina口才了得，但原來她曾是一位沉默寡言的小孩，「細個真係唔鍾意講嘢，甚至喺我小學三年級，班主任話我有自閉症！所以我細個同父母講話想做記者，佢哋都係得啖笑，因為覺得同我性格完全唔匹配！去到而家，我有時會問父母『我去到呢個階段，應該都冇令你哋失望啩？』然後佢哋點頭話係啊，記得準時俾家用就得啦！哈哈！」
即將推出新書《破天方一踩在斜槓線上》的Akina，封面選址沙田新田圍邨拍攝，重回成長地令她充滿回憶，「我4歲搬入嚟，到中三15歲搬走！中間呢十幾年時間，係我一個好重要嘅成長過程，呢度正正係確立我志願嘅地方！」
部分圖片來源：方健儀@Instagram