太極早前合體拍攝MV，眾人重新演繹《留住我吧》，為今年演唱會打響頭炮。結他手德哥表示透過歌曲，希望為港人打氣，「因為疫情大家呢半年都好困擾啦，所以今次曲風會比較多爵士樂，感覺會輕快啲，而且我地呢班中佬都開始年紀大，唱Jazz感覺會型啲！」
Gary Tong指太極欠缺Band Leader一職，隊友即場投票，一致推薦Gary 當選，Gary說：「我其實都唔知會發生咩事，淨係知道今日嚟拍MV，但聽講年尾有個大搞作，冇咩所謂啦，大家埋位就會搞得成㗎啦！話時話我哋都成5年冇一齊拍MV，今次難得聚埋，搞到現場好嘈，因為成班人都鍾意講嘢，但永遠自己有自己講，唔理人㗎！」
主音雷有輝透露樂隊將12月舉行大型個唱，自己演唱會亦是由年底個唱演變出來，「冇十二月太極騷，就冇八月我個人音樂會，佢哋想我打頭陣，同Fans熱吓身！頭先Joey訪問話叫人留錢買12月個騷，呢個兄弟衰到呢，所以八月個唱我會拉埋佢落水，做我演唱會音樂總監，費事佢甩講嘢！」
鄧建明笑說年底太極騷圓夢，希望飲住酒開騷，「因為西九舉行戶外騷，大家睇住個日落，飲番兩杯聽我地唱歌，個氣氛一定正！我哋四面台又做過，紅館又做過，今次終於可以成萬人陪我地睇日落，希望唔會唱唱吓飲醉咗啦！」
