「腦細」林日曦於今日在社交網發出長文，藉着與父親的日常對話，表露對亡母的思念之情。他稱從沒和母親講肉麻的說話，盼望有機會重逢可同對方說出「我愛你」三字。
林日曦透露父親經常提起母親，「佢話：『你阿媽鍾意食羊扒..』問佢想去邊，佢又話：『以前同你阿媽會落街散步..』明明開頭佢叫我決定哂所有嘢，點知後尾佢諗諗下又會話：『你阿媽鍾意呢張相..』、『你阿媽唔鍾意百合..』、『你阿媽好怕大煙..』真係俾佢吹漲..我而家先知道，原來佢係咁深情、咁愛你。」
腦細表示近日狀況不佳，「撞正我工作最忙，撞正我病病哋，但我當呢個考驗係個game，每日打大佬每日過版，其實過過吓又OK。」
他指會與家人互相照顧，「總之我應承你，呢世人我點都會扮返一次乖仔。以後我會照顧好老豆，老豆都會照顧好我；我同家姐又會互相照應；而且有好多好人用唔同方式陪伴我哋幫助我哋；所以，你不必再掛心。」向來不善以言語表達愛的他寫道：「從來冇親口同你講過呢三個字，而家你俾我喺網上扮下孝順仔啦：『媽，我……』……算啦都係太肉麻，下次見到你再親口同你講。係咁。」
部分圖片來源：林日曦@Instagram