一九六一年，史丹利和霍英東、葉漢等組成集團，競投澳門的博彩專利權益，希望堂堂正正光榮回澳。 「嗰陣我都有千幾萬身家，但重驚財力唔夠，就搵我老友霍英東商量，叫佢支持。」 霍英東一再提醒他：「你做咗賭場持牌人，可能連命都冇。」但他堅持：「我係為爭啖氣，其他的事，我諗得好清楚。」
他曾被對頭人趕出澳門，但對方財雄勢大，因而輕敵，完全估計不到他有任何機會東山再起，一直到投標結果揭曉，對頭人才知不妙，開出八個條件，要封殺何鴻燊。
第一：要取何鴻燊性命！ 第二：要令所有澳門酒店停業，讓香港賭客瞓街！ 第三：要全港澳船停航，香港賭客只能扒艇去澳門！ 第四：派乞丐坐在賭場門口趕客。 第五：令澳門沒人敢租私人地方給何鴻燊開賭場。 第六：出錢把原有的賭場夥計、荷官養起來，不讓他們到何的賭場任職。 第七：在何鴻燊的賭場擲手彈。 第八：利用政府內部關係，阻礙何鴻燊履行合約。 八個條件，沒有一個不厲害。
「辣哩！不過兵來將擋。佢想打死我咩？佢一打死我，四十八小時之內，佢都死，我擺低一百萬等人攞。」
於是，對方的第一招，擋住！ 第二招，何鴻燊先向澳門政府租用愛都酒店開業，再向政府要地蓋酒店賭場。第三招，他是佛山輪的永遠董事，港澳全部渡輪停航，唯有佛山輪維持，這一招又成功拆解了。 跟其他招數逐一被史丹利見招拆招，職員荷官全用新人。乞丐盈門嗎？你可以派錢，我也可派錢送他走。 至於政府官員攔阻，新花園賭場（葡京賭場前身）開幕之時，完全沒有正式合約，何鴻燊飛到葡國首都里斯本三次，無牌經營三個月才拿到合約，萬事起頭難，何鴻燊艱苦拆招打江山，從此崛起成為濠江賭王。
黃霑問他：「如果任你揀，你會唔會重揀博彩事業做呢？」 他的確坦白兼爽快，也不考慮便答：「大佬！賭係easy money，易搵錢！而家兩樣最好搵嘅，我都有做！一樣係賭，一樣係地產。」
賭王於是說出開賭的秘密：「兩樣嘢，重係開賭場好啲。因為地產有起跌，開賭場，冇起跌嗰噃！Casino永冇淡月，個埠經濟，人人賭啦，唔boom咩？『生意淡薄，不如賭博！』所以冇乜好得過開賭場呢樣嘢！」
「咁你賭唔賭㗎？」我問。 「我唔賭噃！」
不賭錢的賭王，黃霑自然要問：「點解？」
「我十歲左右，已經乜賭都精！」何鴻燊解釋：「但係我好勝！我個人唔輸得，你做生意，有高低，但係窮則變，變則通。講到賭呢瓣，贏就贏，輸就輸，一輸就冇得變，唔到你諗，所以我一個仙都唔賭。」
「葡京開咗咁耐，最多一次輸過幾多錢俾一個客呢？」
「七百幾萬！係香港熟客。」
「聽講你而家日日都遙遠控制葡京，大上大落，一定要請示你，係唔係？」
「係！」何鴻燊點頭。「廿四小時服務，所以我話俾你聽，我幾勤力㗎！我做親嘢，都親力親為。我有個習慣，我成日都拿住個雞皮紙袋。」
他二十四小時工作，一想起任何事情，馬上寫在雞皮紙袋上，雖然事多務繁，卻也巨細無遺。
據黃霑所知，風雲人物中，邵逸夫也是拍紙簿跟身。 何賭王是中國加波斯再加蘇格蘭更加德國猶太，血統溝到亂籠，被友人稱為「鬼仔何」，但他有順德人性格，三次訪問，黃霑有求，手踭不托。 訪問的時候，何先生知無不言，言無不盡，這番襟懷坦蕩蕩的豪情，黃霑有生以來，未之見也。 的確，黃霑讓賭王charm倒了。因為他對這位時代風雲人物，佩服得五體投地！口服心服得毫無保留！