王浩信（Vincent）正忙於拍攝無綫劇集《踩過界2》，上個月因喉嚨不適要請假，而同劇演員蔡思貝、張振朗等均相繼病倒。在疫情陰霾籠罩下，張振朗表示劇組已調配時間，眾人相對有時間休息。今日（22日），Vincent貼片場照，並留言：「連續19日嘅法庭戲加最後一日要拍除衫嘅沖涼戲！我終於完成了！對我來講好似完成左一個好艱鉅既任務！」
Vincent寫道：「每日12個鐘頭工作，兩三個鐘頭溫書，其他時間做人基本要做嘅嘢，之後每一日急速流暢嘅陳詞以盲俠嘅姿態為唔同嘅案件提出控辯，每一日完成之後都可以話係心力交瘁，所以每日都同自己講休息好第日再嚟！從緊張到輕鬆到最後第15日，要開始脫水狀態循環，準備最後一日沖涼戲，第一日8L水第二日4L，第三日2L⋯⋯到最後一日有需要先可以飲一啖！在雙重環境底下最後兩日精神上真係有一種抽離嘅感覺⋯⋯最後最後將僅餘嘅能量由血液泵到肌肉完成了廠景最後的一場！終於完成⋯⋯」
Vincent表示拍攝過程雖然辛苦，但獲益不少，「懇請大家恕我長氣，但係我深深體會愈艱辛嘅過程學到嘅嘢愈多，好似每一場官司，幫每一個受害者，令我體會到公義⋯⋯大腦吸收知識，一定要在放鬆的情況底下，一緊張就唔入腦等，事情好壞都在乎你的角度，但經過時間，一定會過！到最後都要講返句記住支持《踩過界2》，疫情下共勉之！」
