受武漢肺炎疫情影響，近日不少市民選擇到郊外活動，紛紛結隊行山。而陳健安（On仔）昨日（1日）亦偕同友人登山，為了呼籲大家愛護自己環境，他更組了「清潔小隊」到獅子山清理垃圾。On仔表示這是他第一次行山執垃圾，「我覺得自己好污糟。」
On仔帶同一行十多人上山，他嘆說在途中發現到不少垃圾，「愈無人行入去就更加要走入去執，總要有人去執，況且今日目標清晰，唔係嚟嘆風景。」他指不消半小時，有半個人高的垃圾袋已快滿七成，打後三小時的山路就一直拿十多磅的垃圾，幸好同行的友人都一起分擔，「將垃圾平均分開，每人都拎啲，好在人多，而大家都好明白事理。」
On仔直言覺得自己全身都很骯髒，「最後我覺得自己從頭頂到腳趾尾都好污糟，好想返屋企即刻沖涼，又唔想搭任何交通，因為覺得自己污糟，怕整污糟人哋㗎車，乜都怕。」
他呼籲大家要做好自己，「希望大家理解多啲每個崗位面對嘅困難同心理關口，互相尊重之外，行為上都有所改變，例如有啲膠樽係出現喺危險斜坡上面，清潔者就會因為我亂拋，而要面對呢個跌落山嘅風險。請自行帶走垃圾。」
圖片來源：陳健安@Instagram