朱晨麗（朱朱）與緋聞男友何廣沛於電視劇《大醬園》飾演一對歡喜冤家，二人由鬥餐死變愛到難捨難離，經歷過種種困難後，最終有情人終成眷屬，共偕連理。
其中一場講述朱朱被人打跛腳戲份，何廣沛表露溫柔的一面，不時安慰朱朱，她感動地說：「場戲講大家一齊經歷之後互相扶持，之後認定對方，佢見我隻腳跛住幫我按摩，好細心體貼，令我改觀，有少少開始戀愛感覺。」
另一場令朱朱印象深刻的戲份，就是何廣沛被活埋泥土中，朱朱心痛表示：「當時係夏天，見住佢都幾辛苦，又睇到好多紅螞蟻爬來爬去，佢只可以露出個頭，唔可以亂郁，我都擔心，真係驚佢俾蟻咬，場戲要我瘋狂掘泥救何廣沛離開泥土，感覺真係好真實，驚佢暈咗就唔知點算，好在最後都順利拍攝完成。」
