農曆新年將至，汪明荃（汪阿姐）每年都會親自製作蘿蔔糕，送比親朋好友。汪阿姐今日（16日）喺Instagram分享整蘿蔔糕嘅相同影片，佢話：「一年一度蒸蘿蔔糕工程開始了。」見阿姐穿上綠色衫以及綠色Bling Bling珠片帽下廚，十分型格！
今年，阿姐嘅蘿蔔糕依然落足料，準備咗大量食材，包括冬菇、肥瘦均勻嘅臘腸、臘肉同埋蝦米、瑤柱等，當然仲有主材料蘿蔔，阿姐就話羅家英嘅徒弟梁淑明屋企有種蘿蔔，特別送咗100斤又大又新鮮俾佢；而裝蘿蔔糕嘅盒，阿姐亦專程搵朋友訂造，製作相當認真。
老公家英哥則指佢負責監督，佢大讚阿姐整嘅蘿蔔糕：「由羅氏監督，一定超，超，超正。」
圖片來源：汪明荃、羅家英@Instagram