一連8場的《利瑪竇》音樂劇於上周六（4日）開鑼，當中飾演利瑪竇一角的王梓軒（Jonathan），就喜獲恩保德神父高度讚揚，「做得好好，有99.9分！」Jonathan今次重演利瑪竇，不過排練時間卻比之前少一半，另外對白又要說文言文、意大利文和拉丁文，演出過程具有壓力不少。
Jonathan表示今次為角色下了不少苦功，「每次演出都係出盡全力，上次已經覺得做到最好，但今次再深化，發現上次演漏咗好多嘢，因為實在好多台詞、好多歌、好多位……由三十幾歲，演到六十幾歲死埋，就算掌握到個流程已經好忙。今次就喺入面搵番好多友情、情義、親情，人性嘅軟弱，令觀眾有多啲共嗚，愛同堅持，講好似好抽象，離我哋好遠，但今次演活咗。」
第三場當晚，莫文蔚（Karen）與哥哥莫理斯前來捧場，並異口同聲力讚Jonathan演得出色，「好勁呀！成件事好震撼，同埋我覺得Jonathan好犀利，得佢先可以做到，冇人可以做到呢個角色，真係冇第二個，佢一出場已經覺得好靚仔。」在旁的Jonathan笑說：「因為真係似一個西人。」Karen續說：「你和尚look都好得，今次幾驚喜，我都係基督徒，裏面講嘅好多嘢都打動到我，我覺得成個騷都好難，真係好難，啲音樂、拉丁文、意大利文，好深嘅嘢……」
Jonathan希望可以與Karen合作演音樂劇，更即場邀請對方，Karen話：「可以，好呀！你報咗名喇？」梓軒搞笑地話：「我幫你擔轎嗰個（車夫）！哈哈！」Karen即表示他當然要做坐轎那位。
