王梓軒（Jonathan）將於年尾開十周年個唱，為了錄音演唱會主題曲《多得你》，Jonathan9月遠赴美國LA，找與他相識十多年的戰友唐達（Tat）幫忙，「我十周年，梗係要搵番day one嘅時候，第一個合作嘅人去做歌！」
Jonathan表示：「嗰時錄第一批demo，喺佢個home studio錄，我對住個廁所錄音，因為嗰度先夠遠，唔會吸到啲鍵盤聲……好記得有一次，佢媽咪同Tat講『你唔好煩人喇，人哋依家大支嘢！』佢媽咪係新加坡人，識少少廣東話，我嗰時啱啱入行，佢所講嘅大支嘢係指明星，好搞笑！」
今次Jonathan在Tat家中連續錄了六小時，「我哋中午12點開始錄，錄到黃昏6點，我好少一次過錄6個鐘，但係因為大家都冇時間，所以一日要搞掂，」
他又分享與Tat的往事，「唐達係我大學同學，亦係我師兄，我哋第一次合作除咗係acappella （清唱樂團）外，佢第一張專輯，我都喺入面唱過歌，隻碟個封面仲好搞笑。佢畢業冇幾耐就開始寫歌，我係佢第一個合寫同製作歌曲嘅拍檔，我四隻碟好多歌都係佢做，中間有段時間各有各發展。」
Jonathan感激Tat為他錄製歌曲，「今次搵佢編呢首歌，仲喺佢屋企錄埋，好窩心，我哋都係have fun，做返我哋鍾意嘅聲音，今次加州之旅終於可以同我兄弟重聚。」
