無綫音樂節目《流行經典50年》的主持人薛家燕、胡諾言（胡仔）與陳敏之，不經不覺已合作了兩年多。7月初，家燕姐將交棒給胡楓，為了答謝台前幕後，她早前在銅鑼灣食肆筵開4席慰勞大家，連久未露面的黎小田（Michael）都賞面出席。
家燕姐在席間感謝小田哥的幫忙：「多謝大家支持同配合，大家工作得好開心，我好多謝小田Michael咁錫我，為我做呢個節目，好感動。」小田哥回應道：「我哋拍檔咗好耐，一叫我做呢個《50年》，本來唔係叫50年，叫50強，但做做吓就兩年，嘩！你知電視台啲冷氣啦！做到我病咗，肺炎，醫咗一輪，依家好番。」
家燕姐補充話：「多謝監製，佢約我傾呢個節目時，佢諗起《家燕與小田》，咁我就即刻諗起要請Michael，請Michael出嚟時，佢仲𠵱𠵱哦哦，佢上晒岸，做咩節目吖！佢又話費事喇！不過我話有你支持，個節目好睇好多⋯⋯」
小田哥早前因肺炎，在家休息了一排，今次出席慶功宴時精神不俗。看見小田哥現時身體健康，胡仔笑言：「見到Michael哥氣色好好，型咗、弗咗，我哋頭先食完飯，話約定去Michael屋企。」家燕姐就說：「Michael話你哋嚟要帶啲嘢食，你知啦，佢鍾意食雪糕、蛋糕。」
對於將與節目拍檔離別，敏之感觸地說：「呢兩年幾我哋已經成為一家人，所以見到小田哥，我都好開心。放心，我一定會將你哋辛苦經營咁好嘅節目承傳落去。」雖然家燕姐與胡仔已經完成使命，不過兩人異口同聲表示會做節目嘉賓，更笑指會練定歌先。