天后鄭秀文（Sammi）的「＃FollowMi 世界巡迴演唱會 香港站」昨晚（16日）來到第五場，不少藝人如薛家燕、蔡一智父女、Twins、周慧敏、張繼聰、倪震、鄧萃雯、余安安、張繼聰、余德丞和蔡思貝等都興奮捧場。繼鄭欣宜、李蕙敏、葉蒨文及梁詠琪後，Sammi邀得最索人妻謝安琪作為表演嘉賓，唱出經典歌曲《默契》和《囍帖街》。
當身穿黑色連身服的Kay從升降台出場與Sammi合唱《默契》時，Sammi開心地以「最索人妻」稱呼她。Kay上台後，笑着攬實Sammi的纖腰：「好正呀，雖然成日睇你演唱會，但未試過咁近，可以攬住，好正呀！」
當被問及Sammi怎樣好時，Kay則透露Sammi願意為她祈禱和分憂：「我份人好怕羞，唔係好主動嘅人，你第一次同我講祝福說話又為我禱告，嚇死我，我真係受寵若驚。同埋你好真心，台上台下私下傾偈都係咁真摯、咁用心……我想喊！」她又爆出Sammi曾盛裝打扮探望BB：「喺我生完BB嘅時候，有一日你突然話嚟探我……」Sammi也回憶起那件事，續道：「同埋馮太一齊，馮德倫太太……（雷太，雷頌德太太）馮德倫太太係舒淇，係喎，哈哈哈！」雖然不慎搞了個大烏龍，但依然無阻氣氛繼續高漲！
笑完之後，Kay繼續說：「我心諗點解你個人咁好？好到晏晝嚟我屋企，仲要著到鬼火咁靚喎！（係呀，我落街倒垃圾都係咁！）你嗰日著到成身紅卜卜……（一定搽紅唇膏，我平時喺屋企都搽紅唇膏。）你突然嚟我屋企又搽晒紅唇，好隆重，我受寵若驚，我全家人都好緊張，所以印象好深刻。」Sammi 則笑着回答：「你奶奶好熱情，我哋傾咗好耐，其實我想扯架啦，佢幾乎想請我食埋宵夜！」
Sammi 又自言喜歡和新人合作，因爲他們能為她帶來新的靈感和創意：「喺新歌手身上我學到好多嘢，我都鍾意同新樂手、樂隊、Rapper合作。」一曲已盡，當Sammi準備下台時，Kay卻拉住她，希望能跟她合唱《囍帖街》。然而，Sammi因要換裝束而未能成事，但她選擇以「I Love You」支持Kay，兩人之間的友誼真是羨煞旁人！
部分圖片來源：鄭秀文@Instagram