端午節將至，連詩雅（Shiga）同好姊妹鄭融（Stephanie）噚日（30日）就約埋包糉， 齊齊過手癮。
自家製嘅糉真係特別足料，佢哋除咗準備瑤柱、栗子、冬菇、肥豬肉、鹹蛋黃外，更加入Shiga專程買嘅深井燒鵝，餡料非常豐富！
Shiga分享包糉片段，見佢將材料逐一放上糉葉，但裹水草嘅手勢就有待改善。Shiga留言：「我真係冇坐享其成㗎，其實我真係有落手包㗎，係雞手鴨腳啲咋嘛。」Shiga為咗進步，仲約定Stephanie下年再一齊包糉。
而Stephanie手勢就較為純熟，不過佢就笑言掛住傾偈，忘記放肥豬肉，「如果邊個食到冇眼豬肉嘅糉就唔好意思啦！」
圖片來源：連詩雅、鄭融、JackSo Mama@Instagram