無綫重頭劇《鐵探》本周五播出大結局，劇中飾演游秉高（Bingo）嘅姜皓文（黑仔），就於馬來西亞檳城新居拍片，透露今晚將會係Bingo嘅大結局，並希望觀眾可以準時收看劇集。
黑仔喺Instagram貼出黑白劇照，寫道：「今晚⋯Bingo與萬晞華終於有個了斷⋯⋯『用所有人都覺得錯的方法，去做自己覺得對的事，這樣的人會有什麼下場呢⋯⋯』 #我係兵定賊你分到咩 #卧底 #結局篇#PC38451」。
《鐵探》雖然已於內地播畢，有網站亦率先播出大結局，但黑仔就表示唔擔心，佢話好戲不怕劇透，甚至乎可以重覆睇多次。
黑仔又感激觀眾對《鐵探》嘅支持：「Bingo呢個角色俾我好大滿足感，咁耐無演電視劇，遇到咁好嘅角色，我覺得幸運。Bingo帶俾我好多嘢，帶俾觀眾好多回憶，相信大家都會唔捨得。好多人問Bingo有無延續篇、外傳或電影版？暫時都係未知之數，無論如何好多謝大家對《鐵探》咁支持，咁喜歡Bingo呢個角色，希望在不久將來再見。」
圖片來源：互聯網、myTV SUPER、姜皓文@Instagram