「安仔出軌事件」成為全城焦點，黃心穎剛在ig發文認錯，而一直被蒙在鼓裏的馬國明，今天再為劇集開工，大約四時四十五分，戴上cap帽的馬明由經理人陪同下出現電視城，引來大批記者追訪，為免化妝間引起混亂，馬明亦十分合作到戶外企定定影相，更表示化完妝後再接受訪問。
相隔廿分鐘後，他再次由經理人陪同下接受訪問，「其實呢件事，我知道後好快無嬲感覺，係好平靜，好快變成擔心，擔心牽涉件事嘅所有人，任何一個人受到傷害我都唔希望，可能我唯一可以代表佢（黃心穎）講少少嘢，其實我知佢都知自己做錯咗，佢好想出嚟同大家講 ，但公司暫時驚佢情緒唔係好穩定，驚佢會講錯嘢，所以無安排佢出嚟同大家講，我知佢啱啱出咗ig，講佢自己想講嘅嘢，佢亦都講咗喇，我只可以講佢仍然好年輕，未來仲有好多路要面對及行，希望大家會俾啲空間佢，至於我喇，大家就唔需要擔心我，嚟緊我都繼續拍好我嘅戲，因為依家我都仲開緊工，我唔希望影響到呢套戲進度。至於安仔自己都講咗嘢，我亦都唔會發表任何意見，因為我覺得呢個世界無人有資格發言，除咗安仔太太之外，其他都無資格發言，所以希望件事盡快平息，就算喇！我最後想交代係有些媒體會訪問我屋企人，希望大家就高抬貴手，因為家人都不是圈中人，咁多記者朋友技巧好高，好識引導佢哋去講你哋想要嘅答案，我媽咪突然之間咁多咪隊埋去，佢係會驚，可能會講錯咗嘢，希望唔好將我媽咪嘅說話放大，我唔會就佢講任何講過嘅一句說話去回應大家，希望大家唔好嚇親我屋企人，因為佢哋唔係圈內人，佢地會唔習慣同會驚。」
問到馬明同心穎目前關係？「我無咩可以講，未來會專心工作，多謝大家關心，希望大家高抬貴手，唔好再讓件事發酵，令更多人受傷害，我無咩想再講，多謝大家關心。」
