《第38屆香港電影金像獎頒獎典禮》噚晚已圓滿結束，而憑電影《非分熟女》有份角逐最佳女主角嘅蔡卓妍（阿Sa），雖與獎項擦身而過，但阿Sa就獲得老友打氣支持，令佢非常感動。
阿Sa於社交網分享感受：「好開心可以參與今晚金像獎頒獎典禮，對我嚟講能夠再次入圍，已經係好大嘅肯定。今年整個頒獎典禮無論表演環節，大家嘅感言都好精、好有heart，各個得獎單位都實至名歸。頒獎禮過後又係重新開始嘅一日。keep rolling! Keep walking！我會繼續努力，多謝所有支持我嘅每一位，亦都要多謝今晚幫我造型嘅團隊，辛苦大家喇！」
縱使失落影后， 阿Sa話因得到一班好姊妹、好兄弟嘅支持，而感到十分窩心。
佢於Instagram分享容祖兒（Joey）、鍾欣潼 （阿嬌）、關智斌 （Kenny）同張致恆（Steven）等宣佈結果時嘅搞鬼表情，Joey「緊張到要飲汽水」、阿嬌「緊張到食拳頭」、Kenny「緊張到食蕉」、Steven「緊張到要食飯」，佢仲獲梁浸浸拍片打氣：「契媽加油！」
阿Sa感動留言：「擒晚現場收唔到電話，完咗一出去就睇到呢一堆msg，笑死我又感動死我。
人生有一班真正朋友的確好極。感謝個天俾我認識到咁多錫我嘅人，一定係前世同前世嘅前世同前世嘅前世嘅前世都做咗好多好事，今世有咁多人錫我。Love you guys to the moon and back.」阿Sa坦言一啲都唔緊張，因為佢心裏有數，反而因家人、好朋友、粉絲為佢緊張而感動。」最後阿Sa搞笑地話：「小女子無以為報，唯有……唔好諗多，係以愛相許！同埋繼續努力。」
圖片來源：蔡卓妍@Instagram