唔少粉絲為咗偶像開心，都會出盡心思送各類禮物。而張敬軒（軒仔）今日喺Instagram分享佢收到嘅禮物，但份禮物就令佢嬲到話：「呢單嘢直情要上警訊我話你知！」
事緣，軒仔今日喺屋企清理簽名會fans送嘅禮物，驚見有粉絲送iPhone俾自己，並心疼對方花為佢破費：「搵個錢唔容易，真係有我心，粒眼淚真係爭啲就跌出黎。」但粉絲嘅一番心意，軒仔又點好意思拒絕，佢驚電器擺得耐會壞，所以就諗住攞出嚟用。
軒仔打開個手機盒後，當場嚇一跳：「點知我一打開，我變咗隻澳洲樹熊。亞叔你哋都呃，真係好冇陰功！」
原來盒內有8粒朱古力，粉絲仲好有心機地擺塊鐵板扮重，又附上買電話嘅收據，認真有心思！令軒仔當場寫個服字：「好嘢好嘢，我話你知我班fans真係食腦㗎 。」鬼馬精靈嘅軒仔不忿受騙，留言話︰「正所謂有仇不報非君子」，笑言下次出碟會用光酥餅取替。
唔少圈中朋友並無安慰被騙軒仔，反而留言笑佢太天真， 何韻詩︰「無咗封膠你都收，正懵炳」；蔡卓妍留言︰「人哋花咁多心思嚟呃你 都呃得抵啦」老友王苑之就話：「本人對於買光碟變光酥餅係表示興奮同期待嘅。」
圖片來源：張敬軒@Instagram