偶像組合MIRROR成員姜濤（姜B），出道短短五個月已擁超高人氣，不單成功俘虜大批粉絲，更獲多個品牌喜愛，密密接拍廣告。近日林日曦邀得姜B拍廣告，林其後大讚對方：「佢真係好重星味。」
廣告中，飾演駕駛人士嘅林日曦，為阻止阿Sir抄牌，慌忙趕至泊車位，遇上由姜B嘅飾演的「督導員」，林日曦用盡方法轉移姜Sir視線，令佢落唔到筆抄牌。
其後，林日曦又向姜Sir分享90年代嘅美好，但年輕嘅姜Sir似乎唔太認識嗰個年代嘅產物，林搞笑地話：「黎明即係，你當係90年代嘅姜濤，咁當然黎明就靚仔好多啦。」
令唔少粉絲都期望黎天王可與濤B合作，「拍下一集，90年代姜濤cross over 21世紀黎明可以嗎？」
林日曦今日於社交網寫道：「我第一次見佢，個感覺係……又真係幾靚仔，抵你咁多囡囡fans。」又表示兩個男人同處一車好尷尬「各自都尷尬地夾硬搵下嘢講，互相乜都問下咁。直至佢話入行其中一樣辛苦嘅嘢係要夾硬搵嘢同人講，我就再冇夾硬搵嘢問了。」林日曦仲話初初見到姜B，已覺得佢散發出陣陣星味：「其中一個證明就係，我開開下車，咦，我明明冇開音樂，點解有人唱歌嘅？我望一望佢，吖我頂你個肺佢竟然喺度rap……仲有做埋啲hip hop做手，我差啲撞車。」
圖片來源：100毛、林日曦@Facebook，MIRROR@Instagram