由張衞健主演嘅無綫劇《大帥哥》，深受觀眾歡迎。劇集雖已播畢，一班演員仍不時會聚會，感情非常好。
噚日，大帥府一家又相約開飯啦！「大帥哥」張衞健叫齊「細龜」張達倫，四個手足「馬炭」洪永城、「羅義」徐榮、「顧落蘆」曹永廉、以及「冬來」李嘉聚餐，當然唔少得三位姨太太「沅婉」蔡思貝、「艾妞」楊秀惠、「天嬌」譚凱琪。眾人又喺升降機內玩自拍，重現劇中大帥府嘅熱鬧場景。洪永城搞笑留言︰「咁啱呀，咁都俾我哋係（喺）搭𨋢撞到，仲要齊人。」
各人都分別喺Instagram分享聚會合照， 譚凱琪指佢哋早在大半年前已開始約食飯，直至噚晚先齊人；楊秀惠就上傳一條與蔡思貝同譚凱琪扮貓嘅影片，三人鬥擺可愛甫士，片中又聽洪永城高聲歡談，楊秀惠留言：「洪爺，你把聲好響咯！」洪永城見到一班好兄弟，心情梗激動啲啦。
而蔡思貝就寫道：「縱使今天一整日都處於匆匆忙忙頻頻撲撲的狀態，但在他們面前，我可以坦然自在的做自己，我想，這種像家人般的相處，是一種緣份。」她笑言：「好似有幾廿個爹哋媽咪夾餸畀（俾）我，能夠坐下一起吃飯就很好了。」；張達倫同曹永廉亦有留言多謝大帥哥請客。
圖片來源：蔡思貝、洪永城、楊秀惠、譚凱琪@Instagram