蕭正楠生日快樂！蕭太黃翠如喺老公婚後第一個生日前夕冇出去燭光晚餐，反而選擇咗喺廚房親自下廚煮早餐。作為婚後第一個同老公過嘅生日，翠如bb當然冇錯過呢個放閃好機會，趁機擺番張合照曬恩愛，仲寫埋「廚房宣言」宣示主權。
翠如：「致我大爺，在你生日的好日子，我仍然停留在煮早餐的程度。在你生日的前一日，我仍然要你排隊幫我買珍珠奶茶。在你生日的後一日，我還需要你早上五點車我返工。我為你感到幸福，因為聽說施比受更為有福。我還聽說，以後你的生日，也變成你太太的生日。所以每年3月23日，請好好為我慶祝。生日快樂，你大爺上」
呢段廚房宣言非常霸氣，擺到明係要話俾大家聽蕭生有幾寵愛自己，而蕭生睇完個post都即刻留言：「只要是你煮，餐餐食早餐也是幸福，和一班中小學同學仔一齊排隊買珍珠奶茶可以讓我變年輕，早上五時的空氣最好，遊車河一流！我生日你快樂。」
兩小口咁sweet，唔少網民睇完都表示閃盲眼，但睇見佢哋咁幸福都覺得好開心，「好晒呀，室內都要帶黑超，隔住個Mon都感受到那份甜。」另外，仲有眼利嘅網民留意到蕭生背後有幾幅充滿童真嘅畫作，唔知係邊個畫嘅呢？唔通繼秘密結婚後仲有閃光彈要準備爆！？
圖片來源：黃翠如、蕭正楠＠Instagram