鄭中基一連五場《One More Time 世界巡迴演唱會—香港站》噚晚喺香港紅館舉行最後一場，繼日前邀請到《美女廚房》拍檔方力申、梁漢文後，尾場更邀請到《龍咁威》系列的黃金組合張達明、李璨琛及谷德昭上台，而最令喜出望外嘅係Ronald 宣布今年會開拍《龍咁威3》！
《龍咁威》四子上台聚會顯得非常風騷，當Ronald宣布開拍續集消息後，更即場唱《財神到〉向粉絲收利市「集資」，「冇錢拍，要集資！所以我哋決定而家落嚟大家要派利市畀我，冇利市封唔緊要，畀現金我哋，我哋去後台入，乜貨幣都ok！」而粉絲們都非常識做拎出利市，擺滿晒佢哋個籃。另外，Ronald還大爆當年李璨琛拍攝《龍咁威》的趣事，「佢嗰時猜包剪揼猜輸咗要啜朱咪咪腳趾，而我哋拍咗3個Take都係佢猜輸！」Ronald 仲book咗兩部機去拍攝大家嘅真實反應，非常認真，而李璨琛亦加把口話：「我哋係真猜、真吮㗎！但我已經啜夠喇，畀第二個啜啦！」
只係睇四子台上對話已經非常爆笑，相信《龍咁威3》正式上畫時一定場場爆滿，全院滿座呢！