薛凱琪（Fiona）日前拍攝唇膏廣告，品牌為配合「閨密」主題，邀得Fiona和她的好姊妹鄭融共同拍攝，久未和鄭融見面的Fiona，拍攝期間把握機會向姊妹報告近況，她笑言：「拍攝嘅時候真係好好玩。因為我哋又玩吹泡泡，兩個人就咁拉住手轉圈圈都可以笑到癲咗，因為我哋轉嘅時候都會喺背住鏡頭嗰一秒鐘做啲鬼臉引對方笑場！現場除咗我哋，啲工作人員都睇得好開心！」她表示如果每次開工都有個閨密相伴，過程應該會特別輕鬆愉快。
Fiona又指今次酬勞不錯，說自小已對化妝品感興趣：「因為我小朋友嗰陣想做畫家，會偷媽咪化妝品去畫畫，加上我又唔愛錫佢哋玩到爛晒，所以成日俾媽咪鬧！到大個之後都鍾意化妝，我覺得每次化妝都好似畫緊3D畫咁，喺塊面度畫自己鍾意嘅畫。」
Fiona現在化妝的技巧去爐火純青的境界，五分鐘就可完成「萬聖節」妝容：「可能我平日比較懶，我試過坐車兩分鐘就搞掂去做訪問。近年興『自然美』，所以化妝都以自然風格為主，除非當日要做騷上台，就會誇張少少。」
