女藝人董敏莉（Monie）囡囡子子今日滿月（12月26日）喇！剛升級做新手媽媽嘅Monie今朝早已經急不及待同大家分享喜悅，佢喺社交網上傳咗同囡囡子子嘅合照，睇見張相真係覺得佢兩母囡Sweet到爆啊！
再認真睇睇張相，原來Monie有為囡囡悉心打扮一番，全身以紅白色為主對應而家嘅聖誕主題，子子唔知係咪同媽媽玩得太開心，影相嘅時候累到冇張開眼，睡得正甜。而做咗媽媽一個月嘅Monie表示自己呢個月都掛住湊女，同時大讚囡囡忍耐力高，事關一般BB塊尿片濕咗就會大叫大喊，但子子就好識得體諒媽媽，會一直忍到媽媽發現佢尿片濕咗為止。
圖片來源：董敏莉@Instagram