祖藍講亞男生仔 「好似整水晶甲咁輕鬆」

今晚（22號）音樂劇《唯獨你是王ll》正式公演，亦是祖藍宣布女兒Gabrielle出咗世啦！榮陞爸爸的祖藍今日見傳媒春風滿面說：「囡囡其實17號出咗世，重7.1磅，我有入產房，其實醫生都剪好咗臍帶，我只係剪埋嗰少少，老婆表現得輕鬆，我就好似陪佢整水晶甲咁。個女的名字Gabrielle是老婆改的，因為佢英文好啲，中文名就未諗好，想改同音樂劇和舞台劇有關，因為佢喺肚裏面聽流行曲冇反應，但聽到音樂劇和舞台劇啲歌曲就會喺肚裏面係咁踢，我呼籲大家如果諗到同音樂劇有關的名字，就俾啲靈感我。Gabrielle個名好高貴，搞到我好似要著返套西裝先可以叫佢咁。」

不過囡囡出咗世都幾日，祖藍仲未好好抱過個女，他說：「見到個女好感動，唔敢抱佢住，係因為我知道自己一抱佢就想喊，要做音樂劇我唔喊得，好傷聲，所以應承咗個女，做完個音樂劇我會好好抱佢，大喊一場。」

祖藍等老婆坐完月，會獎勵她，帶去日本旅行過二人世界，他說：「好多女人坐完月都想去日本，因為陀bb嗰陣完全冇得食魚生，我們都唔捨得bb，但有咗bb都要拍拖，要維持夫妻恩愛關係。」祖藍果然係錫老婆嘅好老公。