古巨基和方皓玟在會展舉行演唱會，近年愛上做演唱會創作總監的基仔，把舞台呈現出不少香港情懷，有「井」字形屋邨及維港景色，兩人互唱對方的金曲，包括《歡樂今宵》、《友共情》、《哭乾了眼淚》等。
開騷前幾日喉嚨發炎和感冒的小明，整晚都沒有太多說話，音樂會唱至中段，兩人才跟觀眾打招呼，基仔說：「要靠掌聲俾能量佢！早幾日在Band房我以為自己同男人唱歌！」
基仔透露介紹了自己的醫生給小明，太太就教她飲鹹竹蜂，基仔說：「之前我在加拿大演唱會又係失聲，我個醫生幾日幫我搞掂，就叫小明去睇。」基仔大爆綵排時就像入手術室一樣：「我同樂隊全部戴晒口罩。」
問到是否因為快做爸爸所以要特別保護？基仔就繼續耍太極：「無論點大家都唔想傳染到，都話返去問吓先，我未問到，古太把口好密。」小明就話不覺得古太發福，基仔即笑言：「佢不嬲都有啲福，新春時候要將佢掛起。」小明的媽媽、日籍老公和奶奶亦有到場支持，但就沒有帶兒子，小明唱出《你是你本身的傳奇》獲全場拍手鼓勵，快在紅館開騷的基仔，就明顯「留力」，不少飲歌都未有獻唱。
