《BOYZ THE UNBOXING LIVE演唱會2018》於今晚(16號)假九展Star Hall開騷，不少年輕歌迷跟足dress code穿校服睇騷，令場館頓時充滿青春氣息。穿上白恤衫黑legging 打了黑呔Mani非常校園風，她說:「佢兩個已經食飽飯，今晚有氣有力打觔斗。」
司儀開咪叫各位同學請起立，全場粉絲立即乖乖起身，音樂響起關智斌Kenny和張志恆Steven以《Ready to go》登場，演唱期間二人脫下外褸，Kenny露出背心騷肌，Steven則露出2018版本東莞細格魚網衫，全場嘩然尖叫，十分吸睛!BOYZ唱《La La 世界》時更打觔斗，活力如當年，全場起哄。
Kenny和Steven跟大家打完招呼，講大家十幾年冇見後，Kenny好自豪講自己仲打到觔斗，Steven又講起當年BOYZ有個招牌動作當年在Mani房做過五百幾次，他們更即席示範，非常惹笑。Kenny說:「做演唱會嘉賓都係賺咗整頭化妝，我哋就賺咗個演唱會。」二人重提被指是集體回憶，Kenny說:「我仲好後生，打到觔斗。」Steven表示自己仲着到東莞魚網衫，不過就比當年細格，主要係遮個肚腩。唱完兩首歌其實二人都流晒大汗，台下的阿嬌即上前送上紙巾，兩位師弟都不忘多謝嬌姐!又講起網上講佢哋全晚都唱《死性不改》，粵曲版，Jazz版，Kenny預告今晚會不只唱一次，全場歡呼。
上半場有I Iove you boy’z 做表演嘉賓，粉絲表現亦非常興奮，少爺占話網上有人討論大家想睇BOYZ還是想睇I Iove you Boy’z的演唱會，結論係一半一半，聊表少少敬意，不如一齊開個騷，更向台下老闆楊受成拋媚眼，說「嗰度有場」，Steven笑說門票最平1388元，少爺占說:「Boyz+ l love you Boy’z 2019」有幾人想睇？粉絲反應非常熱烈，唔知今次又成唔成事呢?