噚晚上海舉行Marvel 10周年慶典，Eason企正中間，班Marvel超級英雄要企埋一邊，惹來外界意論紛紛。
萬眾期待的Marvel超級英雄片《復仇者聯盟3：無限之戰》（Avengers: Infinity War）下周三才在港美同步開畫，噚晚無喇喇殺出E神同復仇者爆發「無心之戰」。
話說《復仇者聯盟3：無限之戰》主角包括「鐵甲奇俠」羅拔唐尼（Robert Downey Jr.）、「變形俠醫」馬克路法奴（Mark Ruffalo）、「蜘蛛俠」湯賀蘭（Tom Holland）及「邪神洛基」湯希丹斯頓（Tom Hiddleston）噚日到上海舉行記者會造勢，又到迪士尼主題公園出席紅地氈活動，晚上還出席Marvel 10周年慶典。
慶典中仲有陳奕迅（Eason）﹑容祖兒﹑張靚穎和炎亞綸等參加。Eason獻唱咗《Let it out》，已令網民質疑佢喺活動上唱廣東歌唔知同個活動有乜關係。
噚晚明明係Marvel活動，但Eason仲好似混淆咗Marvel同DC角色超人，佢喺台上話：「他們叫什麼人？超人嗎？」隨即有人向佢更正，Eason回應：「超級英雄，Whatever（是但啦）。」惹來唔少Marvel粉絲留言，指摘Eason唔尊重在場一班扮演Marvel超級英雄的外國影星。
佢地大合照時，Eason亦企咗中間位置，反而一眾戲中主角要企埋一邊，羅拔唐尼好似面露不悅之色，張相曝光後，亦引起大批Marvel粉絲不滿。不過亦有粉絲為Eason講好話：「拍照時他一直指著漫威主創那邊，還蹲下來明顯意識到自己不適合站C位（中間位）啊，能看出他有在化解尷尬啊。」
Eason喺表演結束後，亦喺instagram曬出多張相，包括大合照同羅拔唐尼握手照，仲留言話：「郭偉亮，我誠懇的道歉，今天沒有找到合適的機會把『熨斗人』（郭偉亮）介紹給正牌鐵甲奇俠認識…不過我有把你的音樂和作品分享給眾人。請原諒。另外我很榮幸能夠見到你們！」
唔知係咪Eason已收到風有好多爭議聲，噚日又快快手刪晒有關照片。不過影迷唔駛放上心，準備迎接Marvel鋪排10年嘅《復仇者聯盟3：無限之戰》仲好過喇!
下周三港美同步上映的《復仇者聯盟3：無限之戰》萬眾期待。
撰文：安東尼奧
圖片：互聯網